ഖത്തറിൽ കായിക മത്സരങ്ങൾ കാണുന്നവർക്ക് സമ്മാനങ്ങൾ നേടാൻ അവസരംദോഹ: ഖത്തറിലെ കായിക പ്രേമികൾക്കായി ‘ഹയ്യോ’ (Hayyoh) എന്ന പേരിൽ പുതിയ സ്പോർട്സ് ലോയൽറ്റി പ്ലാറ്റ്ഫോം അവതരിപ്പിച്ചു. സ്റ്റേഡിയങ്ങളിൽ നേരിട്ടെത്തി മത്സരങ്ങൾ കാണുന്ന ആരാധകർക്ക് സമ്മാനങ്ങൾ നൽകുക എന്ന ലക്ഷ്യത്തോടെയാണ് പുതിയ ആപ്പ് പുറത്തിറക്കിയിരിക്കുന്നത്.മത്സരങ്ങളുടെ ടിക്കറ്റുകൾ വാങ്ങി കളി അവസാനിക്കുന്നതുവരെ സ്റ്റേഡിയത്തിൽ തുടരുന്ന ആരാധകർക്ക് ആപ്പിലൂടെ പോയിന്റുകൾ നേടാനാകും. അംഗങ്ങൾക്ക് ടയർ പോയിന്റുകളും (Tier Points) ഹയ്യോ പോയിന്റുകളും (Hayyoh Points) ഉൾപ്പെടെ രണ്ട് തരത്തിലുള്ള പോയിന്റുകളാണ് ലഭിക്കുക. പങ്കെടുക്കുന്ന ഓരോ മത്സരത്തിനും ഒരു ടയർ പോയിന്റും സ്ഥിരീകരിക്കപ്പെട്ട ഓരോ ഹാജരിനും 1,000 ഹയ്യോ പോയിന്റുകളും ലഭിക്കും.ഹയ്യോ പോയിന്റുകൾ ഉപയോഗിച്ച് ഭക്ഷണം, റീട്ടെയിൽ, ടെലികമ്മ്യൂണിക്കേഷൻസ്, ബ്യൂട്ടി ആൻഡ് വെൽനസ്, വിനോദം, ഹോസ്പിറ്റാലിറ്റി, ഓട്ടോമോട്ടീവ് സേവനങ്ങൾ തുടങ്ങി വിവിധ വിഭാഗങ്ങളിലെ ഡിജിറ്റൽ, ഫിസിക്കൽ സമ്മാനങ്ങൾ സ്വന്തമാക്കാൻ കഴിയും.ടയർ പോയിന്റുകൾ കൈമാറ്റം ചെയ്യാനോ മറ്റൊരാൾക്ക് നൽകാനോ സാധിക്കില്ല. എന്നാൽ അംഗങ്ങൾക്ക് അവരുടെ അക്കൗണ്ടിലേക്ക് ആശ്രിതരെയും ചേർക്കാൻ അവസരമുണ്ട്.ടിക്കറ്റ് വാങ്ങുന്ന സമയത്ത് ഹയ്യോ ഐ.ഡി നൽകുകയോ ഹയ്യോ ആപ്പിലൂടെ ടിക്കറ്റിംഗ് പങ്കാളികളുടെ വെബ്സൈറ്റ് സന്ദർശിച്ച് ടിക്കറ്റുകൾ അക്കൗണ്ടുമായി ബന്ധിപ്പിക്കുകയോ വേണം. ഗൂഗിൾ പ്ലേ സ്റ്റോറിലും ആപ്പ് സ്റ്റോറിലും ആപ്പ് സൗജന്യമായി ലഭ്യമാണ്. രജിസ്ട്രേഷനായി സാധുവായ ഖത്തർ ഐ.ഡി നിർബന്ധമാണ്.