തിരുവനന്തപുരം: സംസ്ഥാനത്ത് വൈദ്യുതി പ്രതിസന്ധി അതിരൂക്ഷമായി തുടരുന്ന സാഹചര്യത്തില് ഇന്നും കടുത്ത വൈദ്യുതി നിയന്ത്രണങ്ങള് വേണ്ടിവരുമെന്ന് മുന്നറിയിപ്പ് നല്കി കെഎസ്ഇബി.
ഇന്ന് വൈകുന്നേരം 6.15-നും അർദ്ധരാത്രി 12.45-നും ഇടയിലുള്ള പീക്ക് അവർ സമയങ്ങളില് സംസ്ഥാനത്തിന്റെ വിവിധ ഭാഗങ്ങളില് നിശ്ചിത സമയത്തേക്ക് അപ്രഖ്യാപിത പവർകട്ട് ഉണ്ടാകുമെന്നാണ് കെഎസ്ഇബി ഔദ്യോഗികമായി അറിയിച്ചിരിക്കുന്നത്. പുറത്തുനിന്നുള്ള വൈദ്യുതി ലഭ്യതയിലുണ്ടായ കുറവും സംസ്ഥാനത്തെ ആഭ്യന്തര ഉപഭോഗം കുത്തനെ ഉയർന്നതുമാണ് അടിയന്തരമായി നിയന്ത്രണങ്ങള് ഏർപ്പെടുത്താൻ ബോർഡിനെ നിർബന്ധിതരാക്കിയത്.
മുൻവർഷങ്ങളെ അപേക്ഷിച്ച് സംസ്ഥാനത്തെ വൈദ്യുതി ഉപഭോഗത്തില് റെക്കോർഡ് വർദ്ധനവാണ് ഇപ്പോള് രേഖപ്പെടുത്തുന്നത്. മുൻകാലങ്ങളില് സെപ്റ്റംബർ മാസത്തില് ഉണ്ടായിരുന്ന ശരാശരി ഡിമാൻഡിനേക്കാള് ഏകദേശം 1100 മെഗാവാട്ട് വൈദ്യുതിയുടെ അധിക ഉപയോഗമാണ് ഈ വർഷം കേരളത്തില് ഉണ്ടായിട്ടുള്ളതെന്ന് കെഎസ്ഇബി ചൂണ്ടിക്കാട്ടുന്നു. കഴിഞ്ഞ ദിവസങ്ങളെ അപേക്ഷിച്ച് ഇന്ന് മാത്രം ഏകദേശം 700 മുതല് 900 മെഗാവാട്ട് വരെ വൈദ്യുതിയുടെ വലിയ കുറവ് സംസ്ഥാനത്ത് അനുഭവപ്പെടാൻ സാധ്യതയുണ്ടെന്നാണ് ബോർഡിന്റെ വിലയിരുത്തല്. ഗ്രിഡ് സംവിധാനത്തിന്റെ സുരക്ഷ ഉറപ്പാക്കുന്നതിനാണ് ഈ കുറവ് നികത്താൻ പലയിടങ്ങളിലായി ലോഡ് ഷെഡ്ഡിങ് ഏർപ്പെടുത്തുന്നത്.
സംസ്ഥാനത്തെ പ്രധാന അണക്കെട്ടുകളില് ജലനിരപ്പ് കുറവായതിനാല് ആഭ്യന്തര ജലവൈദ്യുത പദ്ധതികളില് നിന്നുള്ള ഉല്പാദനവും കടുത്ത പ്രതിസന്ധിയിലാണ്. ഉത്തരേന്ത്യൻ സംസ്ഥാനങ്ങളില് നിന്നുള്പ്പെടെ വൈദ്യുതി അടിയന്തരമായി എത്തിക്കാനുള്ള ശ്രമങ്ങള് കെഎസ്ഇബി ഊർജ്ജിതമാക്കിയിട്ടുണ്ട്. വരും ദിവസങ്ങളിലും ഈ പ്രതിസന്ധി തുടരാൻ സാധ്യതയുള്ളതിനാല് ഉപഭോക്താക്കള് വൈദ്യുതി ഉപയോഗത്തില് കടുത്ത നിയന്ത്രണം പാലിക്കണമെന്ന് കെഎസ്ഇബി ആവശ്യപ്പെട്ടു. പ്രത്യേകിച്ച് വൈദ്യുതി ഉപയോഗം ഏറ്റവും കൂടുതലുള്ള വൈകുന്നേരം 6 മണി മുതല് രാത്രി 12 മണി വരെയുള്ള സമയങ്ങളില് വാഷിംഗ് മെഷീൻ, ഇസ്തിരിപ്പെട്ടി, എയർ കണ്ടീഷണറുകള്, വെള്ളം അടിക്കുന്ന മോട്ടോറുകള് തുടങ്ങിയവയുടെ ഉപയോഗം പരമാവധി ഒഴിവാക്കി സഹകരിക്കണമെന്നും ബോർഡ് പൊതുജനങ്ങളോട് അഭ്യർത്ഥിച്ചു.